Qohum evliliklərinə nəzarət sistem vasitəsilə yoxlanılacaq - Nazirlik

Azərbaycanda nikaha daxil olmaq istəyən şəxslər arasında qan qohumluğu olub-olmaması Ədliyyə Nazirliyinin informasiya sistemi vasitəsilə yoxlanılacaq. Bu barədə Ədliyyə Nazirliyinin yaydığı açıqlamada deyilir. 

Yoxlamalar qeydiyyat şöbələri, konsulluqlar və ya yerli icra hakimiyyətləri tərəfindən həyata keçiriləcək.

2024-cü il iyulun 1-dən qüvvəyə minəcək dəyişikliklərlə Ailə Məcəlləsinin 12-ci maddəsində nəzərdə tutulan nikaha icazə verilməyən qohumlar dairəsi genişləndirilib.

Bioloji nənə və ya babası ortaq olan əmioğlu və əmiqızı, xalaoğlu və xalaqızı, dayıqızı və bibioğlu kimi yaxın qohumlar arasında nikah artıq qanunla qadağan edilir. Qadağa həmçinin əmi ilə qardaşı qızı və digər oxşar qohumluq əlaqələrini də əhatə edir.

Əgər sistemlə qohumluq əlaqələri müəyyən edilə bilməzsə, nikaha daxil olmaq istəyənlər və onların valideynlərinin doğum şəhadətnamələri təqdim edilməlidir. Əlavə sənədlər də tələb oluna bilər. Qohumluq sübut olunarsa, nikah qeydə alınmayacaq.

Aytac