İsrail ordusu: HƏMAS-ın hərbi qanadının komandiri öldürülüb

İsrail Müdafiə Qüvvələri (İMQ) Qəzza zolağının şimalına endirilən aviazərbə nəticəsində doqquz israilli girovun saxlanılmasında iştirak etdiyi bildirilən HƏMAS-ın hərbi qanadının komandiri Məhəmməd Həməd Məhəmməd Qabeyni öldürüb.Bu barədə İMQ və İsrailin Şin Bet təhlükəsizlik xidmətinin birgə bəyanatında deyilir.

İMQ-nin məlumatına görə, Qabeyn 2023-cü il oktyabrın 7-də qaçırılan doqquz israillinin Qəzza zolağında saxlanılmasında iştirak edib.

Ordunun bildirdiyinə görə, o, son dövrlərdə İsrail hərbçilərinə və mülki şəxslərə qarşı hücumların hazırlanmasında, həmçinin HƏMAS-ın hərbi imkanlarının bərpasında iştirak edib. İMQ bu fəaliyyətlərin atəşkəs rejiminin pozulması ilə müşayiət olunduğunu bildirib.

Bəyanatda qeyd olunub ki, zərbə zamanı mülki əhali arasında itkilərin və dağıntıların minimuma endirilməsi üçün yüksək dəqiqlikli sursatlardan istifadə olunub və havadan müşahidə aparılıb.