Rus bölməsində nəticələr bəzi fənlər üzrə daha yüksəkdir, lakin müəllim çatışmazlığı ciddi problemdir

Rus bölməsi üzrə bəzi fənlərdə nəticələr Azərbaycan bölməsi ilə müqayisədə daha yüksək olsa da, bu fərq dil məsələsindən çox şəhər və kənd əhalisi arasındakı resurs fərqi ilə bağlıdır.  Bunu Dövlət İmtahan Mərkəzinin (DİM) sədri Məleykə Abbaszadə bildirib.

Onun sözlərinə görə, Rus bölməsində xüsusilə riyaziyyat, fizika və kimya üzrə nəticələrdə üstünlük görünür.

“Məsələn, fizika və kimya fənləri üzrə Rus bölməsi abituriyentləri daha yüksək nəticə göstərirlər. Amma bu, Azərbaycan-Rus qarşıdurması deyil. Bu, şəhərlərlə kəndlər arasında müəllim, resurs və tədris imkanları fərqidir,” – Abbaszadə vurğulayıb.

İngilis dili və informatika Rus bölməsində daha güclüdür

Məleykə Abbaszadə əlavə edib ki, Rus bölməsində təhsil alan şagirdlər arasında İngilis dili və informatika fənləri üzrə nəticələr də nisbətən yüksəkdir. Bu isə, əsasən, şəhər mühitində daha çox tədris resurslarının və ixtisaslaşmış müəllimlərin mövcudluğu ilə əlaqələndirilir

Dövlət sifarişi yerlərində üstünlük Azərbaycan bölməsi məzunlarına verilir

Abbaszadənin sözlərinə görə, dövlət sifarişi ilə ayrılan yerlərdə əsas üstünlük Azərbaycan bölməsi üzrə məzunlara verilir, çünki onların say çoxluğu və daha geniş ixtisas seçim imkanları var.

“Dövlət sifarişli yerlərdə iştirak edənlərin əksəriyyəti Azərbaycan bölməsindəndir. Bəzi xüsusi ixtisaslar, məsələn, filologiya kimi sahələrdə isə yerlərin bir hissəsi yalnız Rus bölməsi üçün nəzərdə tutulur. Lakin bu yerlər bəzən boş qalır,” – o bildirib.

Rus bölməsində müəllim çatışmazlığı – fizika və kimya fənləri üzrə kritik vəziyyət

DİM rəhbəri həmçinin bildirib ki, rus bölməsi üzrə tədris aparan fizika və kimya müəllimlərinin çatışmazlığı müşahidə olunur.

“Biz imtahanlar zamanı ikidilli ekspertləri dəvət etdikdə görürük ki, Rus bölməsində ixtisaslı müəllimlər çox azdır. Seçim yoxdur. Məlum olur ki, bəzi məktəblərdə ümumiyyətlə fizika və kimya müəllimi yoxdur,” – Abbaszadə xəbərdarlıq edib.

Coğrafiya müəllimliyi kimi sahələrdə də Rus bölməsi üzrə kadr çatışmazlığı müşahidə olunur. “

200 baldan yuxarı nəticə göstərən abituriyent tapmaq çətindir. Bu da kontingentin formalaşmamasına səbəb olur,” – o əlavə edib.

Məleykə Abbaszadənin fikrincə, Rus və Azərbaycan bölmələri arasında fərqlər sadəcə dil və metodologiya ilə deyil, resurs bərabərsizliyi və insan kapitalı ilə bağlıdır. 

DİM rəhbəri bu istiqamətdə təhsil siyasətinin daha məqsədyönlü və balanslaşdırılmış olmasının vacibliyini vurğulayıb.

N.Təbrizli