Media və Yayım Şurası Türkiyədə Azərbaycan əleyhinə kampaniyadan narahatlığını bildirib

Media və Yayım Şurası son günlər Türkiyənin media və sosial media məkanında Azərbaycan-Türkiyə münasibətlərinə xələl gətirməyə yönəlmiş paylaşımların və iddiaların artmasından narahatlığını bildirib.Bu barədə Şuranın bəyanatında bildirilib.

Şuranın məlumatına görə, yayılan paylaşımlarda əsassız və qərəzli iddialara, həmçinin dezinformasiyalara yer verilir və bu materiallar iki ölkə arasında münasibətlərə dair ictimai rəydə mənfi təsəvvür formalaşdırmağa yönəlib.

Bəyanatda qeyd olunub ki, bu paylaşımlar ayrı-ayrı şəxslərin təsadüfi təşəbbüsləri deyil, Şuranın qiymətləndirməsinə görə, müəyyən əlaqələndirmə və vahid yanaşma əsasında həyata keçirilən məqsədyönlü kampaniyanın tərkib hissəsidir.

Şura hesab edir ki, bu cür fəaliyyətlər Türkiyə qanunvericiliyinin tələblərinə ziddir və müvafiq hallarda qanunvericiliyin tələblərinin tətbiq olunmasını gözləyir.

Bəyanatda bildirilib ki, Azərbaycan tərəfi Türkiyə mediasında və sosial media seqmentində baş verən prosesləri izləyir və qanunvericilik çərçivəsində müvafiq tədbirlərin görülməsi, o cümlədən kampaniyanın təşkilatçıları və iştirakçılarının Azərbaycana girişinin məhdudlaşdırılması imkanını nəzərdən keçirir.

Şura iki ölkə və xalqları arasında formalaşmış münasibətlərə və strateji müttəfiqliyə xələl gətirə biləcək cəhdlərin qarşısının alınması istiqamətində tədbirlərin görülməsinin vacibliyini vurğulayıb.