Laçında meşə yanğınına görə üç nəfər saxlanılıb – rəsmi

Laçının Hoçaz və Mollalar kəndləri yaxınlığında dağlıq ərazidə baş vermiş meşə yanğınının ehtiyatsız davranış nəticəsində törədildiyi müəyyən olunub. Bu barədə Daxili İşlər və Fövqəladə Hallar nazirlikləri birgə bəyanat yayıb.

Aparılan araşdırmalar nəticəsində məlum olub ki, Laçın rayonunun Sus kəndindən olan üç nəfərin yandırdığı ocaq çətin relyefli ərazidə 14 hektar meşə sahəsinə yayılıb.

Hadisə ilə bağlı cinayət işi başlanıb, şübhəli şəxslər polis tərəfindən saxlanılıb və cinayət məsuliyyətinə cəlb olunublar. İstintaq tədbirləri davam etdirilir.

Fövqəladə Hallar Nazirliyi bildirir ki, Dövlət Yanğından Mühafizə Xidməti ərazidə yanğının tam söndürülməsi istiqamətində işləri davam etdirir.