Əmlak Xidməti və tabeli qurumlarda dövlət vəsaitlərinin istifadəsində uyğunsuzluq aşkarlanıb

Azərbaycan Hesablama Palatası İqtisadiyyat Nazirliyi yanında Əmlak Məsələləri Dövlət Xidməti (ƏMDX) və onun tabeliyindəki qurumlar üzrə uyğunluq auditi nəticəsində dövlət vəsaitlərinin istifadəsində ciddi uyğunsuzluqlar aşkar edib. Bu barədə qurum məlumat yayıb. 

Palatanın hesabatına əsasən, 2015–2024-cü illər ərzində xaricdə yerləşən Mədəniyyət Mərkəzinin əmlakının sığortalanması məqsədilə iki ayrı qurum tərəfindən paralel ödənişlər həyata keçirilib. ƏMDX tərəfindən bu məqsədlə 1,316 milyon manat, Mədəniyyət Mərkəzi tərəfindən isə 274,779 avro məbləğində vəsait qeyri-rezident sığorta şirkətinə ödənilib.

Hesablama Palatası məsələ ilə bağlı 2024-cü ilin noyabrında Maliyyə Nazirliyinə rəsmi məktub göndərib.

Bundan əlavə, audit zamanı dövlət əmlakının idarəetməyə verilməsindən əldə olunan gəlirlərin dövlət büdcəsinə düzgün təsnifatla daxil edilmədiyi müəyyən edilib. Hər iki məsələ üzrə icra hələ başa çatmayıb və nəzarət tədbirləri davam etdirilir.