Bakıda məktəb direktoruna sosial şəbəkələrdəki şikayətlərdən sonra töhmət verilib

Bakının 201 nömrəli orta məktəbinin direktoru Afaq Əliyeva sosial şəbəkələrdə yayılmış çoxsaylı şikayətlərdən sonra şəhər Təhsil İdarəsinin apardığı monitorinqin nəticəsinə əsasən rəsmi töhmət alıb.

Monitorinq zamanı tədris prosesinin təşkili, pedaqoji-metodiki fəaliyyətin keyfiyyəti və ümumilikdə məktəbin idarəçilik məsələləri araşdırılıb.

Təhsil İdarəsinin məlumatında qeyd olunur ki, yoxlama nəticəsində bir sıra nöqsanlar aşkar edilib.

Bunlar arasında dərs yükünün müəllimlər arasında ədalətsiz bölüşdürülməsi, idarəetmədə şəffaflığın pozulması və daxili nizam-intizam qaydalarının qeyri-effektiv tətbiqi kimi məsələlər də yer alıb.

Sosial şəbəkələrdə yayılan şikayətlərdə müəllimlər direktorun şəxsi münasibətlərə əsaslanaraq dərs bölgüsü apardığını, bəzilərinə əlavə saatlar verdiyini, digərlərinə isə ümumiyyətlə saat ayırmadığını iddia edirdilər.

Müəllimlər həmçinin direktorun kollektivlə münasibətlərində kobudluq və təzyiq hallarının olduğunu bildirirdilər.

Təhsil İdarəsi bildirib ki, direktorun davranışları və idarəetmə üslubu mövcud qaydalara uyğun gəlmədiyindən ona töhmət verilib. Qurum eyni zamanda xəbərdarlıq edib ki, gələcəkdə oxşar halların təkrar baş verməsi daha sərt intizam tədbirlərinə – o cümlədən vəzifədən azad olunmaya səbəb ola bilər.

Hadisə ictimaiyyət arasında geniş rezonansa səbəb olub. Bəzi valideynlər sosial mediada direktorun işdən uzaqlaşdırılmasını tələb etsələr də, digərləri onun tərəfini tutaraq məktəbin ümumi səviyyəsindən razı olduqlarını bildiriblər.

N.Təbrizli