Qadın fermerlərin aqrar sığorta barədə məlumatlandırılması məqsədilə görüş keçirilib

Aqrar Sığorta Fondu (ASF) və Azərbaycan Kənd Qadınları Assosiasiyası arasında “Azərbaycanda qadın fermerlər və aqrar sığorta” mövzusunda onlayn görüş keçirilib.

Görüşdə ASF və “Aqrar Sığorta” Müştərək Sığorta Şirkəti ASC-nin nümayəndələri, Assosiasiyanın rəhbərliyi və müxtəlif rayonlardan (Bakı, Balakən, Qax, Zaqatala, Ağdam və s.) qadın fermerlər iştirak edib.

ASF İdarə Heyətinin üzvü Roman Əmircanov görüş zamanı aqrar sığorta mexanizmi, əhatə dairəsi və tətbiq sahələri barədə məlumat verib. Bildirilib ki, 2019-cu il 19 avqust tarixli prezident fərmanı ilə tətbiq edilən sistem bitkiçilik, heyvandarlıq və balıqçılıq sahələrini əhatə edir. Hazırda 41 növ bitki, iri və xırda buynuzlu heyvanlar sığortalanır.

Təqdimatda qeyd olunub ki, aqrar sığorta fermerləri təbii fəlakətlər, fırtına, yanğın, sel, şaxtavurma, vəhşi heyvanların hücumu və digər risklərdən qoruyur. Sığorta haqqının 50%-i dövlət tərəfindən ödənilir.

Qadın fermerlər görüşdə torpaq sahələrinin sənədləşməsi, sığortanın əhatə dairəsi və əvvəlki ödənişlər barədə suallar səsləndirib. Məlumat verilib ki, hazırda bağlanan sığorta müqavilələrinin 9%-i qadın fermerlərə məxsusdur və bu göstərici artmaqdadır. İndiyədək 200-ə yaxın qadın fermer ASF-dən sığorta ödənişi alıb.

Arıçılıq və quşçuluq təsərrüfatlarının sığortalanması ilə bağlı da müvafiq layihənin hazırlandığı və gələcəkdə bu sahələrin də əhatə olunmasının planlaşdırıldığı bildirilib.

Aqrar sığorta məhsulları, şərtlər və tariflər barədə ətraflı məlumat ASF-nin rəsmi veb səhifəsi və sosial media kanalları vasitəsilə, həmçinin 1651 nömrəsi ilə əldə edilə bilər.

Aytac