“Qarabağ”ın Çempionlar Liqasındakı ev oyunlarının stadionu müəyyənləşməyib - Qurbanov

Azərbaycan çempionu “Qarabağ” Çempionlar Liqasının qrup mərhələsində dörd ev oyunu keçirəcək, lakin komandanın Tofiq Bəhramov adına Respublika stadionundan Bakının Olimpiya stadionuna köçüb-köçməyəcəyi hələ bəlli deyil. Bu barədə baş məşqçi Qurban Qurbanov “Ferentsvaroş”la matçdan sonra bildirib.

“UEFA-nın Çempionlar Liqasında çox ciddi tələbləri var. Mən bilmirəm Olimpiya stadionunun meydanı hazırdırmı. Yaxınlarda orada konsert olub. Əgər AFFA və ya başqa qurum təklif etsə, biz orada oynamağa hazırıq,” –  Qurbanov bildirib.

“Qarabağ” iki oyunun nəticəsinə görə (5:4) Macarıstanın “Ferentsvaroş” klubunu məğlub edib.

“Futbolçularımı təbrik edirəm. Oyun çox gərgin idi, böyük məsuliyyət vardı. Çempionlar Liqasına düşə bildik. Yenidən Avropanın ən güclü turnirində oynayacağımız üçün sevinirəm. Dövlət başçısı bizi təbrik etdi. Mən də onu təbrik edirəm! O, uzun illərdir ki, “Qarabağ”ı Çempionlar Liqasında görməyi arzulayırdı. Onu və ailəsini təbrik edirəm. Prezident bir daha göstərdi ki, bizə diqqətlə baxır", -  baş məşqçi Qurban Qurbanov komandasının Çempionlar Liqasının əsas mərhələsinə yüksəlməsindən sonra təəssüratlarını bölüşüb. 

O həmçinin azərkeşlərin rolunu da vurğulayıb.

"Bu gün stadion tamam fərqli idi. Belə atmosferi çoxdan görməmişdim. Azarkeşlər də bizim kimi həyəcanlı idilər. Onlara təşəkkür edirəm. Futbolçulara oyundan əvvəl soyuqqanlı olmalarını, rəqibin təxribatçı sözlərinə fikir verməmələrini tapşırmışdım. Çünki belə vəziyyətdə uğur qazanmaq mümkün deyil. Psixoloji hazırlıq çox vacib idi. Onlardan eyni vaxtda həm cəsarətli, həm də soyuqqanlı olmalarını istədim", - Qurbanov vurğulayıb.

Səkkiz il əvvəl "Qarabağ" Çempionlar Liqasının əsas mərhələsində oynayıb.

Qurbanovun fikrincə, " illər keçdikcə dəyişirik, futbolumuz da dəyişir. Bu gün ora yenidən qayıtmaq birlik və xarakter sayəsində mümkün olub".

"Mətbuat məndə göz yaşı gördümü? Mən onları gizlətməyə çalışırdım (gülümsəyir). Davam edəcəyik, yorulmamışıq. Bəzən çempionat oyunlarından sonra da belə hisslər olur. Səadət göz yaşlarını saxlamaq olmur". -  baş məşqçi bildirib.

Qələbəni necə qeyd edəcəyinə gəlincə məşqçi bildirib ki, bu günü qardaşları ilə qeyd edəcək.

"Rayonumuzdan qardaşlarım gəlib, məni gözləyirlər. Onlara gedəcəyəm, qucaqlaşacağıq. İndi isə düşüncələrimiz qarşıdakı oyunlardadır. Kimlərlə qarşılaşacağımızı görəcəyik. Futbolçunun arzusu Çempionlar Liqasında oynamaqdır. Bu, böyük təcrübədir. Azərbaycan futbolunun tanıdılması üçün də mühüm addımdır. Ola bilsin, dövlət səviyyəsində futbola maraq daha da artsın",  -  Qurbanov bildirib.

O həmçinin Barselona komandası ilə oyunun əhəmiyyətindən də danışıb.

“Barselona”nın düşərgəsində olmuşam. Onlarla oynamalıyıqmı? Mənim üçün böyük təhlükə ola bilər. Amma azarkeşlər üçün “Barselona”nın Bakıya gəlməsi çox gözəl olardı” - Qurbanov deyib.

N.Təbrizli