Azərbaycan Rusiyaya nota verib

14 noyabr 2025-ci il tarixində Rusiya Federasiyasının Azərbaycandakı səfiri Mixail Yevdokimov Azərbaycan Xarici İşlər Nazirliyinə çağırılıb və Kiyevdə ölkənin diplomatik nümayəndəliyinin ərazisinə raket düşməsi ilə bağlı rəsmi etiraz nümayiş etdirilib. Bu barədə XİN məlumat yayıb.

Məlumata görə, noyabrın 14-də saat təqribən 01:00 radələrində Kiyevə raket və dron hücumları zamanı “İsgəndər” tipli raketlərdən biri Azərbaycanın Ukraynadakı səfirliyinin ərazisinə düşüb. Partlayış nəticəsində səfirliyin hasarının bir hissəsi dağılıb, inzibati bina, konsulluq şöbəsi, konstruksiyalar və xidməti avtomobillər zədələnib. Hadisə zamanı insan tələfatı qeydə alınmayıb.

Görüşdə tərəfə bildirilib ki, bu, Azərbaycanın Ukraynadakı diplomatik nümayəndəliklərinə qarşı ilk belə hadisə deyil. XİN xatırladıb ki:

2022-ci il 10 mart – Xarkivdəki Fəxri Konsulluq aviazərbə nəticəsində ciddi dağıntıya məruz qalıb, 2024-cü il 2 yanvar – Kiyevdə səfirlik binasından 35 metr aralı “Kinjal” raketinin yaratdığı krater aşkar edilib və partlamamış sursat tapılıb, 2025-ci il 28 avqust – Səfirliyə yaxın əraziyə hava zərbəsi endirilib, inzibati bina, konsulluq şöbəsi və səfirin rezidensiyası zədələnib, 2025-ci il 8 və 18 avqust – Odessa vilayətində SOCAR-ın neft bazası dron hücumlarına məruz qalıb və işçilər xəsarət alıb.

Azərbaycan tərəfi bu hücumların ardıcıllığının məqsədyönlü olub-olmaması ilə bağlı suallar doğurduğunu vurğulayıb. Bildirilib ki, diplomatik missiyaların koordinatları 2022-ci ilin aprelində Rusiya tərəfinə təqdim edilib və Rusiyanın Müdafiə Nazirliyi bu məlumatları nəzərə alacağını bildirib.

Görüş zamanı Azərbaycanın diplomatik nümayəndəliklərinə qarşı hücumların qəbuledilməz olduğu qeyd olunub və Rusiya tərəfindən hadisəyə dair ətraflı araşdırma və izahat tələb edilib.