Ölkədə məzuniyyət qaydalarına dəyişiklik edilir

Azərbaycanda əsas məzuniyyət qaydalarına dəyişikliklər təklif edilir. Bu barədə Əmək Məcəlləsinə dəyişiklik layihəsi Milli Məclisin Regional məsələlər komitəsinin bugünkü onlayn iclasında müzakirə olunub. 

Hazırkı qanunvericilik əmək məzuniyyəti dövrünə düşən iş günü hesab olunmayan bayram günlərinin məzuniyyətin təqvim günlərinə daxil edilməməsini və ödənilməməsini nəzərdə tutur.

Layihəyə görə, bundan sonra məzuniyyət dövrünə təsadüf edən bayram günləri, ümumxalq hüzn günü və səsvermə günü ödənilməyəcək və məzuniyyət günləri kimi hesablanmayacaq. Lakin məzuniyyətin ümumi müddəti bu günlərin sayı qədər artırılacaq.

Sənəddə həmçinin qeyd olunur ki, Qurban və Ramazan bayramları digər iş günü hesab olunmayan bayramla üst-üstə düşərsə və bu hal əmək məzuniyyəti dövrünə təsadüf edərsə, həmin günlər yalnız bir gün kimi nəzərə alınacaq.