"Temu" adı ilə vətəndaşlara saxta iş təklif olunur - Diqqətli olun!

Azərbaycan Elektron Təhlükəsizlik Xidməti (ETX) son günlər sosial şəbəkələrdə, xüsusilə Telegram vasitəsilə “Temu 1106” adı ilə yayılan iş təkliflərinin dələduzluq fəaliyyətinin bir hissəsi olduğunu bildirib.

Qurumun məlumatına görə, həmin hesab vətəndaşlara “evdən onlayn qazanc”, “asan iş”, “sifarişlərin icrasına görə yüksək gəlir” kimi təqdim edilən saxta elanlar göndərir və onları müxtəlif keçidlərə daxil olmağa təşviq edir. ETX dələduzların bu üsulla istifadəçilərin şəxsi məlumatlarını və maliyyə vəsaitlərini ələ keçirdiyini qeyd edib.

ETX vətəndaşlara şübhəli mənbələrdən daxil olan mesajlardakı keçidlərə daxil olmamağı, şəxsi və bank məlumatlarını heç bir halda üçüncü tərəflərə təqdim etməməyi tövsiyə edib.

Qurum son günlər oxşar onlayn fırıldaqçılıq hallarının artdığını bildirərək istifadəçiləri diqqətli olmağa çağırıb.