Zahid Oruc dövlət qulluğu sertifikatının üç il qüvvədə qalmasını təklif edib

Dövlət qulluğu sertifikatının qüvvədəolma müddətinin layihədə nəzərdə tutulan iki il əvəzinə üç il müəyyənləşdirilməsi və sertifikatın uzadılması üçün sadələşdirilmiş yenilənmə testinin tətbiqi təklif olunur. Bunu deputat Zahid Oruc Dövlət Qulluğu Məcəlləsinin layihəsinin Milli Məclisdə müzakirəsi zamanı deyib.

Onun sözlərinə görə, müsabiqədə uğur qazansa da, vakant vəzifəyə təyin edilməyən namizədlər üçün keçid güzəştləri də nəzərdə tutulmalıdır.

“Əgər məqsəd peşəkarlığı qorumaqdırsa, namizədi eyni imtahana yenidən qaytarmaq həm bürokratik, həm də maddi yükdür”, - deputat bildirib.

Zahid Orucun təqdim etdiyi məlumata görə, 2025-ci ildə dövlət qulluğunda 4 065 vakant vəzifə üzrə 15 743 qeydiyyat aparılıb. İmtahanlarda faktiki olaraq 7 350 nəfər iştirak edib, 2 920 namizəd uğurlu nəticə göstərib, 2 054 nəfər isə vəzifəyə təyin olunub.

Deputat bildirib ki, yeni layihəyə əsasən, uğurlu nəticə göstərməsinə baxmayaraq vəzifəyə təyin edilməyən namizəd əvvəlki beş il əvəzinə iki il ehtiyat kadr kimi saxlanılacaq və bu müddətdə analoji vakansiyaya təyin oluna biləcək.

O, dövlət qulluqçularının tez-tez imtahan, attestasiya və daxili qiymətləndirmələrə cəlb olunmasının onların əsas fəaliyyətinə mənfi təsir göstərə biləcəyini də qeyd edib.

Zahid Oruc dövlət qurumları üçün vahid vəzifə təsnifatının yaradılmasını da təklif edib. Onun sözlərinə görə, eyni dəyərə malik iş müxtəlif qurumlarda fərqli karyera statusu daşımamalıdır.

“Bütün dövlət orqanlarını əhatə edən vahid vəzifə təsnifatına ehtiyac var. Əməkhaqqı və karyera məsələləri də bir-birindən ayrılmazdır”, - deputat deyib.

Orucun sözlərinə görə, 2025-ci ilin sonunda Azərbaycanda 27,3 min dövlət qulluqçusu olub. Onların 27,4%-i və ya təxminən 7,5 min nəfəri dövlət qulluğunda 15 il və daha çox xidmət edib.

Gülnar Nazimqızı