Bu qərar hesabına Fond 10 milyard ABŞ dollarından artıq gəlir əldə edib - Ölkə başçısı

2025-ci ildə ölkə qızıl ehtiyatlarını artırmaqla bağlı strateji qərar qəbul edib və bu addım geosiyasi risklərin fonunda özünü doğruldub. Bunu Azərbaycan Prezidenti İlham Əliyev bildirib.

Əliyev yanvarın 5-də yerli televiziya kanallarına müsahibəsində deyib ki, qlobal prosesləri nəzərə alaraq qızılın qiymətinin artacağını əvvəlcədən proqnozlaşdırıb və nəticədə qiymətlər kəskin yüksəlib.

Prezidentin sözlərinə görə, qızıl ehtiyatlarının artırılması Azərbaycan Dövlət Neft Fonduna təkcə bu qərar hesabına 10 milyard ABŞ dollarından artıq gəlir qazandırıb.

Əliyev qeyd edib ki, qızılın qiyməti azalacağı təqdirdə ehtiyatların həcmi də aşağı düşə bilər və hazırda Azərbaycanın strateji valyuta ehtiyatları gündəlik olaraq dəyişir. Onun sözlərinə görə, bu göstərici 83–85 milyard ABŞ dolları aralığında dəyişə bilər.

Prezident əlavə edib ki, buna baxmayaraq, adambaşına düşən ehtiyatlar baxımından Azərbaycanın göstəriciləri dünya üzrə ən yüksək səviyyələrdən biri olaraq qalır.

Gülnar Nazimqızı