Rusiya və Ukrayna müharibəsində iştirak edən 4 azərbaycanlı həbs olunub - DTX

Azərbaycan Dövlət Təhlükəsizliyi Xidməti (DTX) Rusiya və Ukrayna arasında davam edən hərbi əməliyyatlarda iştirak etmiş Azərbaycan Respublikası vətəndaşlarının müəyyən edilərək cinayət məsuliyyətinə cəlb olunduğunu açıqlayıb. 

DTX-nin yaydığı məlumata görə, Azərbaycan qanunvericiliyi ilə nəzərdə tutulmayan silahlı birləşmələrin tərkibində ölkə hüdudlarından kənarda hərbi münaqişələrdə iştirak edən şəxslərin aşkarlanması məqsədilə əməliyyat-istintaq tədbirləri davam etdirilir.

Toplanmış məlumatlar əsasında indiyədək Rusiya–Ukrayna müharibəsində xeyli sayda Azərbaycan vətəndaşının iştirak etdiyi, onların bir qisminin həlak olduğu, itkin düşdüyü, yaralandığı, eləcə də əsir götürülən şəxslərin olduğu müəyyən edilib.

Araşdırmalar nəticəsində 1991-ci il təvəllüdlü Nəbiyev Real Eldəniz oğlu, 1993-cü il təvəllüdlü Hüseynov Faris Famil oğlu, 1994-cü il təvəllüdlü Məmmədov Ali Elnur oğlu və Mirhəşimli Murov Həsən oğlunun Rusiya və Ukraynanın silahlı birləşmələrinin nəzarəti altında döyüş əməliyyatlarında iştirak etdikləri sübuta yetirilib.

Qeyd olunan şəxslər 2026-cı ilin yanvar ayında saxlanılıb, barələrində cinayət işi başlanılıb və məhkəmənin qərarı ilə həbs qətimkan tədbiri seçilib.

DTX bir daha vətəndaşlara xəbərdarlıq edərək bildirib ki, xarici dövlətlərin ərazisində qanunsuz silahlı birləşmələrin tərkibində döyüş əməliyyatlarında iştirak Azərbaycan Respublikasında cinayət məsuliyyəti yaradır və bu cür hallarla bağlı hüquqi tədbirlər bundan sonra da qanunvericiliyə uyğun şəkildə davam etdiriləcək.