Deputat: rəhbər dəyişiklikləri institutların sabitliyini pozmamalıdır

Rəhbər dəyişiklikləri idarəetmənin təbii hissəsi olsa da, qurumda dərhal kütləvi kadr dəyişikliyi aparılmamalıdır. Bunu deputat Müşfiq Cəfərov Milli Məclisin fevralın 20-də keçirilən iclasında deyib. 

Cəfərov qeyd edib ki, yeni rəhbər mövcud mexanizmin icraçısı kimi fəaliyyət göstərməli, təsdiq olunmuş fəaliyyət planı, strateji xətt və institusional struktur şəxsi yanaşmalardan asılı olaraq köklü şəkildə dəyişdirilməməlidir.

Deputat əlavə edib ki, yüksək nəticə göstərən və peşəkar kadrların yalnız fərdi baxış səbəbilə dəyişdirilməsi institutların sabitliyinə zərər verir. O vurğulayıb ki, dövlət idarəçiliyi şəxslər üzərində deyil, sistem üzərində qurulmalı, rəhbər dəyişikliyi menecer dəyişikliyi kimi qəbul olunmalıdır.

Cəfərov yeni yaradılan monitorinq agentliyinin rolunu xüsusi əhəmiyyətli hesab edərək bildirib ki, struktur sabitliyi, kadr qərarlarının əsaslandırılması və edilən dəyişikliklərin məqsədəuyğunluğu da qiymətləndirilməlidir. Şəxsi yanaşmalar yox, obyektiv göstəricilər və dövlət maraqları əsas götürülməlidir.

O inanır ki, bu yanaşma dövlət idarəçiliyində sabitliyi, peşəkarlığı və uzunmüddətli effektivliyi gücləndirəcək.

Gülnar Nazimqızı