Üç ölkə Naxçıvana atılan dron zərbəsini pisləyib

İranın pilotsuz uçuş aparatları ilə Azərbaycanın Naxçıvan Muxtar Respublikasına endirdiyi zərbələrə beynəlxalq reaksiyalar davam edir. Ukrayna, Səudiyyə Ərəbistanı və Qətər bu hücumları pisləyərək Azərbaycana dəstək ifadə edib.

Ukraynanın Azərbaycandakı səfiri Yuri Qusev bildirib ki, ölkəsinin Bakıdakı səfirliyi İran dronlarının Naxçıvan ərazisinə hücumu barədə məlumatları diqqətlə izləyir.

“Biz Azərbaycana dəstəyimizi və həmrəyliyimizi ifadə edir, qlobal təhlükəsizliyi sarsıdan rejimlərə qarşı mübarizəni gücləndirmək üçün hamını birləşməyə çağırırıq”, – səfir qeyd edib.

Səudiyyə Ərəbistanının Xarici İşlər Nazirliyi də İranın Azərbaycana pilotsuz uçuş aparatları ilə zərbələrini pisləyib.

Qətər Xarici İşlər Nazirliyi isə bəyanatında İranın Naxçıvan beynəlxalq hava limanına PUA zərbələrini və Türkiyəyə ballistik raketlə hücum cəhdini qətiyyətlə pislədiyini bildirib.

Bəyanatda qeyd olunub ki, bu cür addımlar təhlükəli eskalasiya, dövlətlərin suverenliyinin kobud şəkildə pozulması və regionun təhlükəsizliyi ilə sabitliyinə birbaşa təhdiddir.

Qətər tərəfi İranı regionda yeni gərginlik ocaqları yaratmaqdan çəkinməyə, beynəlxalq hüquqa və mehriban qonşuluq prinsiplərinə riayət etməyə çağırıb. Nazirlik həmçinin Türkiyə və Azərbaycanla tam həmrəy olduğunu və onların suverenliyini, təhlükəsizliyini və ərazi bütövlüyünü qorumaq üçün gördüyü tədbirləri dəstəklədiyini vurğulayıb.

Gülnar Nazimqızı