Fransa BMT TŞ-nin təcili iclasını çağırıb

Fransa Livanda BMT-nin Müvəqqəti Qüvvələrinə (BMTMQ) qarşı baş vermiş hücumlarla bağlı BMT Təhlükəsizlik Şurasının növbədənkənar iclasının keçirilməsini tələb edib.Bu barədə Fransanın xarici işlər naziri Jan-Noel Barro məlumat verib.

Barro bildirib ki, Fransa martın 29-da BMTMQ mövqelərinin atəşə tutulmasını, bir sülhməramlının həlak olmasını və bir neçə nəfərin yaralanmasını qətiyyətlə pisləyir. O, bu cür hücumların qəbuledilməz və əsassız olduğunu vurğulayıb.

Nazir həmçinin martın 30-da mina partlayışı nəticəsində iki sülhməramlının həlak olması və daha iki nəfərin yaralanması ilə bağlı insidenti, eləcə də BMTMQ-nin Fransa kontingenti ilə baş verən hadisəni pisləyib və hadisələrin bütün təfərrüatlarının araşdırılmasına çağırıb.

Fransa xarici işlər naziri əlavə edib ki, BMT personalının təhlükəsizliyinə qarşı yönəlmiş bu cür hərəkətlər yolverilməzdir və məsələ ilə bağlı narahatlıq İsrailin Parisdəki səfirinin diqqətinə çatdırılıb.