Azərbaycan Prezidenti Türkiyə vitse-prezidenti ilə görüşüb

Azərbaycan Prezidenti İlham Əliyev aprelin 2-də Türkiyə Respublikasının vitse-prezidenti Cevdet Yılmazın başçılıq etdiyi nümayəndə heyətini qəbul edib.

Görüşdə Cevdet Yılmaz Türkiyə Prezidenti Rəcəb Tayyib Ərdoğanın salamlarını çatdırıb. İlham Əliyev minnətdarlığını bildirərək salamların Türkiyə Prezidentinə ötürülməsini xahiş edib.

Yılmaz Azərbaycanın yanında olmaqlarını vurğulayıb və bunun Şuşa Bəyannaməsinin əsas prinsiplərindən biri olduğunu qeyd edib. Əliyev isə Azərbaycan-Türkiyə qardaşlıq və strateji müttəfiqlik münasibətlərinin bütün sahələrdə uğurla inkişaf etdiyini bildirib.

Görüşdə qarşılıqlı səfərlərin əməkdaşlığı genişləndirdiyi, Bakıda Türk Dövlətləri Təşkilatına üzv dövlətlərin hökumət başçıları və vitse-prezidentlərinin görüşünün təşkilat çərçivəsində əməkdaşlığı gücləndirmək üçün əhəmiyyətli olduğu vurğulanıb.

Cevdet Yılmaz Şimali Kipr Türk Cümhuriyyətinin Baş nazirinin toplantıda iştirakını məmnunluqla qeyd edib və Azərbaycan tərəfinə təşəkkürünü çatdırıb. O, həmçinin Qəbələdə keçirilən Türk Dövlətləri Təşkilatının Dövlət Başçıları Şurasının 12-ci Zirvə Görüşünün yüksək səviyyədə baş tutduğunu və Azərbaycanın sədrliyinin uğurlu olduğunu vurğulayıb.

Görüş zamanı həmçinin ikitərəfli əməkdaşlıq perspektivləri, regional vəziyyət və qarşılıqlı maraq doğuran digər məsələlər müzakirə edilib.