İslamabadda keçirilən İran-ABŞ danışıqları başa çatıb - Yenilənib

İslamabadda Pakistanın vasitəçiliyi ilə İran və ABŞ arasında keçirilən danışıqların ilk günü 14 saatlıq intensiv məsləhətləşmələrdən sonra başa çatıb.Bu barədə İslam Respublikası hökumətinin mətbuat xidməti "X" sosial şəbəkəsində məlumat yayıb.

"Pakistanın vasitəçiliyi ilə İran və Amerika nümayəndə heyətlərinin danışıqları 14 saatdan sonra başa çatıb və hazırda hər iki tərəfin texniki qrupları ekspert mətnlərinin mübadiləsini aparır. Mövcud fikir ayrılıqlarına baxmayaraq, danışıqlar prosesi davam etdiriləcək", - deyə paylaşımda bildirilib.

"Tasnim" agentliyinin məlumatına görə, tərəflər bazar günü Pakistanın danışıqları davam etdirmək təşəbbüsünü təsdiqləyiblər.

***

Pakistanın paytaxtı İslamabadda İran və ABŞ nümayəndə heyətləri arasında danışıqların üçüncü raundu başlayıb.Bu barədə İranın Dövlət Televiziyası (IRIB) xəbər verir.

"İran və ABŞ-nin nümayəndə heyətləri Pakistan rəsmilərinin vasitəçi kimi iştirakı ilə İslamabadda üçtərəfli danışıqların yeni raunduna başlayıblar", - məlumatda deyilir.

Daha əvvəl ekspertlər səviyyəsində və dar tərkibdə görüşlər keçirilib.

***

İran dövlət televiziyası IRIB-in məlumatına görə, tərəflər fasilədən sonra danışıqları bərpa ediblər.

Nəşr bildirib ki, nümayəndə heyətləri arasında danışıqlar qısa fasilədən sonra yenidən başlayıb, fasilə zamanı isə ekspertlər və müvafiq qurumların nümayəndələri səviyyəsində müzakirələr aparılıb.

***

CNN-in məlumatına görə, ABŞ və İran rəsmiləri arasında İslamabadda keçirilən danışıqlar bu dəfə qismən birbaşa formatda aparılır.

İran mənbələri CNN-ə bildiriblər ki, sülh danışıqları tərəflər arasında üzbəüz görüşlər şəklində həyata keçirilir.

Bundan əvvəl müzakirələrin vasitəçilər üzərindən aparılıb-aparılmayacağı ilə bağlı qeyri-müəyyənlik mövcud idi.

ABŞ rəsmisi və regional mənbə daha əvvəl bildirmişdi ki, yüksək riskli danışıqlar həm birbaşa, həm də dolayı formatda keçirilə bilər.

Məlumata görə, əvvəlki mərhələlər əsasən Omanın vasitəçiliyi ilə dolayı danışıqlar şəklində aparılıb, lakin ötən yaz nüvə müzakirələri zamanı məhdud birbaşa təmaslar da baş tutub.

***

ABŞ və İran rəsmiləri 28 fevralda ABŞ-İsrail hücumları ilə başlayan müharibədən sonra əldə olunmuş müvəqqəti atəşkəs fonunda Pakistanda daimi razılaşma üçün danışıqlara başlayıblar. 

Pakistanlı mənbələrin bildirdiyinə görə, tərəflər arasında danışıqlar ölkənin vasitəçiliyi ilə başlayıb və hazırda davam edir.

Mənbələr qeyd ediblər ki, ABŞ və İran nümayəndə heyətləri birbaşa görüşdən əvvəl İslamabadda yerləşən oteldə Pakistan rəsmiləri ilə ayrı-ayrılıqda müzakirələr aparıblar.

“İki nümayəndə heyətinin nə vaxt üz-üzə görüşəcəyini hazırda deyə bilmərəm. Onlar hazırda Pakistan rəsmiləri ilə görüşürlər”, – mənbələrdən biri bildirib.

Danışıqlarda İran nümayəndə heyətinə parlament sədri Məhəmməd Baqer Qalibaf rəhbərlik edir. ABŞ tərəfinə isə vitse-prezident Ceyms Devid Vens başçılıq edir. 

Məlumata görə, İran nümayəndə heyətinə xarici işlər naziri Abbas Əraqçi, eləcə də digər yüksək vəzifəli rəsmilər daxildir, ABŞ nümayəndə heyətində isə prezident Donald Trampın xüsusi elçisi Stiv Uitkoff və Cared Kuşner təmsil olunur. 

Danışıqlarda vasitəçi qismində Pakistanın Baş naziri Şahbaz Şərif, xarici işlər naziri İshaq Dar və ordu komandanı Asim Munir iştirak edir.

Danışıqlardan əvvəl həm İran, həm də ABŞ nümayəndə heyətləri Pakistanın Baş naziri ilə ayrıca görüşlər keçiriblər.