Bayramov Tailandın Baş naziri ilə görüşdə əməkdaşlıq və UNESCAP prioritetlərini müzakirə edib

Xarici işlər naziri Ceyhun Bayramov BMT-nin UNESCAP-ın 82-ci sessiyası çərçivəsində Tailandın Baş naziri Anutin Charnvirakul ilə görüşüb. Bu barədə Azərbaycan Xarici İşlər Nazirliyi məlumat yayıb.

Tərəflər Azərbaycanın UNESCAP-a sədrliyi çərçivəsində prioritetləri, Azərbaycan–Tailand ikitərəfli münasibətlərinin perspektivlərini və regional məsələləri müzakirə ediblər.

Bayramov sosial media platforması “X”də bildirib ki, Tailand tərəfi ilə əməkdaşlığın genişləndirilməsində maraqlıdır və tərəfdaşlığın inkişafını gözləyir.

Nazir hazırda Bangkok şəhərində işgüzar səfərdədir. Səfər çərçivəsində onun UNESCAP-ın 82-ci sessiyasında iştirakı və çıxışı, həmçinin yüksək səviyyəli rəsmilərlə bir sıra görüşlər keçirməsi planlaşdırılır.

UNESCAP Asiya-Sakit okean regionunda iqtisadi və sosial inkişafın təşviqi məqsədilə fəaliyyət göstərən əsas BMT platformalarından biridir. Azərbaycanın bu quruma sədrliyi ölkənin regionlararası əməkdaşlıqda rolunun gücləndirilməsi və çoxtərəfli diplomatiyanın genişləndirilməsi baxımından əhəmiyyətli hesab olunur.