Əliyev: Qlobal qeyri-müəyyənlik fonunda multilateralizm və əməkdaşlıq vacibdir

Azərbaycan Prezidenti İlham Əliyev BMT-nin UNESCAP-ın 82-ci sessiyasının iştirakçılarına müraciətində artan geosiyasi gərginlik fonunda beynəlxalq əməkdaşlığın və multilateralizmin gücləndirilməsinin vacibliyini vurğulayıb.

Prezident bildirib ki, hazırkı dövrdə münaqişələrin genişlənməsi və qeyri-müəyyənlik beynəlxalq təhlükəsizlik və inkişaf nailiyyətlərinin kövrəkliyini ortaya qoyur. O, Azərbaycanın dövlətlərin suverenliyi və ərazi bütövlüyü prinsiplərinə sadiqliyini bir daha bəyan edib.

Əliyev qeyd edib ki, 2020-ci ildən sonra regionda yeni reallıqlar formalaşıb, Azərbaycan ərazi bütövlüyünü bərpa edib və Ermənistanla sülh gündəliyinə başlayıb. Onun sözlərinə görə, artıq iki ölkə arasında ticarət əlaqələri yaranıb və Azərbaycan Ermənistan üçün tranzit imkanları təmin edir.

Prezident çıxışında statistik göstəricilərə də diqqət çəkib: son iki onillikdə ölkə iqtisadiyyatı təxminən 4 dəfə artıb, yoxsulluq və işsizlik səviyyəsi isə təxminən 5%-ə enib. O həmçinin bildirib ki, Böyük Qayıdış Proqramı çərçivəsində 80 mindən çox insan azad edilmiş ərazilərə qayıdıb.

Əliyev əlavə edib ki, 2020-ci ildən sonra mina partlayışları nəticəsində 400-dən çox mülki şəxs həlak olub və ya yaralanıb, bu isə beynəlxalq əməkdaşlığın vacibliyini artırır.

Prezident çıxışında Azərbaycanın nəqliyyat və enerji sahəsində roluna da toxunaraq bildirib ki, Orta Dəhliz və Zəngəzur dəhlizi regional bağlantıları gücləndirərək Asiya ilə Avropa arasında əlaqələri genişləndirə bilər.

O həmçinin Azərbaycanın beynəlxalq platformalarda fəallığının artdığını qeyd edib və ölkənin müxtəlif təşkilatlarda sədrliyi, eləcə də qlobal tədbirlərə ev sahibliyini buna nümunə göstərib.

UNESCAP BMT-nin ən böyük regional platformalarından biri olaraq Asiya və Sakit okean regionunda iqtisadi inkişaf, ticarət və əlaqələndirməni təşviq edir. Azərbaycanın bu quruma sədrliyi fonunda ölkə özünü regional nəqliyyat qovşağı və enerji tərəfdaşı kimi mövqeləndirməyə çalışır. Eyni zamanda, post-münaqişə dövründə yenidənqurma və reinteqrasiya prosesləri ölkənin daxili inkişaf gündəliyində əsas yer tutur.

Gülnar