Deputat: Regionların inkişafı proqramı yoxsulluğu azaldır

Azərbaycanda regionların sosial-iqtisadi inkişaf proqramları ölkə üzrə balanslı inkişafın təmin edilməsinə, işsizliyin azaldılmasına və əhalinin paytaxta axınının qarşısının alınmasına xidmət edir. Bunu Milli Məclisin deputatı Azər Əmiraslanov bildirib.

Deputat qeyd edib ki, proqramın əsas məqsədi təkcə Bakı şəhərinin deyil, bütün regionların paralel inkişafını təmin etməkdir. Onun sözlərinə görə, bu siyasət yoxsulluğun azaldılması və məşğulluğun artırılması ilə birbaşa bağlıdır.

Əmiraslanov vurğulayıb ki, regionlar arasında sosial-iqtisadi fərqlərin tam aradan qaldırılması mümkün olmasa da, əsas hədəf bu fərqlərin tədricən azaldılmasıdır. O əlavə edib ki, belə fərqlər Türkiyə, Almaniya və Avropa İttifaqı kimi inkişaf etmiş məkanlarda da mövcuddur.

Deputat həmçinin bildirib ki, regional inkişaf üçün maliyyə əsasları vaxtilə formalaşdırılan neft strategiyası ilə təmin olunub və proqram ölkədə planlı idarəetmə modelinin nümunəsi hesab olunur.

Onun sözlərinə görə, regionların inkişafı “Böyük Qayıdış” proqramı ilə tamamlanır və yeni inzibati yanaşmalar, o cümlədən iqtisadi rayonlaşmanın 10-dan 14 rayona genişləndirilməsi bu siyasətin tərkib hissəsidir.

Azərbaycan 2004-cü ildən etibarən regionların sosial-iqtisadi inkişafına dair dövlət proqramları həyata keçirir. Bu proqramlar infrastrukturun yaxşılaşdırılması, yeni iş yerlərinin yaradılması və regionların investisiya cəlbediciliyinin artırılması kimi məqsədləri əhatə edir. 

Gülnar Nazimqızı