İlham Əliyev Ukraynanın İrpen şəhərinin fəxri vətəndaşı elan edilib

Ukraynanın İrpen şəhər Şurası Azərbaycan Prezidenti İlham Əliyevi şəhərin fəxri vətəndaşı elan edib.Bu barədə İrpen şəhər Şurasının rəhbəri və şəhər meri vəzifəsini icra edən Anjela Makeyeva sosial şəbəkə hesabında məlumat verib.

O, bildirib ki, müvafiq qərar şuranın çərşənbə günü keçirilən iclasında qəbul olunub.

Makeyeva qeyd edib ki, İrpen icması ilə Azərbaycan arasında uzunmüddətli dostluq və tərəfdaşlıq əlaqələri mövcuddur və bu münasibətlər mədəni, tarixi bağlar, eləcə də sülhə ortaq bağlılıq əsasında qurulub.

Onun sözlərinə görə, Azərbaycan hökumətinin dəstəyi ilə İrpendə lisey və şəhər poliklinikası bərpa olunub, Azərbaycan Prezidenti ilə Ukrayna Prezidenti Volodymyr Zelenskyy arasında son görüş zamanı ayrılmış elektrik avtobuslarının isə yaxın vaxtlarda şəhərə çatdırılması gözlənilir.

Makeyeva əlavə edib ki, fəxri ad Prezident İlham Əliyevin simasında Ukraynaya dəstək göstərən Azərbaycan xalqına ithaf olunub.