Parlament Avropa Parlamenti ilə əlaqələri dayandırır

Azərbaycan Respublikasının Milli Məclisi Avropa Parlamenti ilə bütün əməkdaşlıq əlaqələrinin dayandırılması barədə qərar qəbul edib.

Milli Məclis bildirib ki, Avropa Parlamenti Azərbaycanın ərazi bütövlüyü və suverenliyi ilə bağlı məsələlərdə “beynəlxalq hüquq normalarına və ədalət prinsipinə uyğun mövqe sərgiləməyib” və xüsusilə Ermənistanla münaqişə dövründə baş verən hadisələrə “lazımi qiymət verməyib”.

Qərara əsasən,  Milli Məclisin Avropa Parlamenti ilə bütün formatlarda əməkdaşlığı dayandırılır,
Avropa İttifaqı-Azərbaycan Parlament Əməkdaşlıq Komitəsi çərçivəsində iştirak dayandırılır,
Avronest Parlament Assambleyası ilə bağlı üzvlüyə xitam verilməsi proseduruna başlanılır və bu müddətdə Azərbaycan nümayəndə heyəti tədbirlərdə iştirak etməyəcək.

Bəyanatda qeyd olunur ki, 2020-ci ildə baş vermiş İkinci Qarabağ müharibəsindən sonra Avropa Parlamenti Azərbaycan əleyhinə “çoxsaylı qətnamələr qəbul edib” və bu sənədlərdə “qərəzli yanaşma və əsassız ittihamlar yer alıb”.

Milli Məclis əlavə edib ki, bu addım regionda sülh və sabitlik proseslərinə “maneə yaradan yanaşmalara cavab” kimi qiymətləndirilməlidir.

Qətnaməyə 114 deputat lehinə səs verib, bir nəfər bitərəf qalıb. 

Avropa Parlamenti cümə axşamı Ermənistanın demokratik dayanıqlığının dəstəklənməsinə dair qətnamə qəbul edərək, Azərbaycanla bağlı bir sıra tənqidi müddəalar irəli sürüb. Rəsmi Bakı buna etiraz olaraq Avropa İttifaqının Bakıda səfirinə etiraz notası təqdim edib. 

Gülnar Nazimqızı