Azərbaycanla Ukrayna arasında Anlaşma Memorandumu imzalanıb

Azərbaycanın rəqəmsal inkişaf və nəqliyyat naziri Rəşad Nəbiyev Leypsiq şəhərində Ukraynanın Baş nazirinin müavini, icma və ərazilərin inkişafı naziri Oleksi Kuleba ilə görüşüb.Bu barədə Nəbiyev  "X" sosial şəbəkə hesabında yazıb.

Nazir bildirib ki, tərəflər beynəlxalq avtomobil daşımalarında tranzit imkanlarının artırılması və rəqəmsal həllərin tətbiqi məsələləri ətrafında fikir mübadiləsi aparıblar.

Onun sözlərinə görə, görüş çərçivəsində beynəlxalq avtomobil daşımalarında elektron icazə sisteminin (e-Permit) tətbiqinə dair Anlaşma Memorandumu imzalanıb.

Nəbiyev bildirib ki, təşəbbüs sərhəd keçidlərinin sadələşdirilməsinə, daşımaların rəqəmsallaşdırılmasına və daşıyıcılar üçün daha çevik əməliyyat mühitinin yaradılmasına xidmət edəcək.