Azərbaycan və Yunanıstan XİN-ləri arasında siyasi məsləhətləşmələr keçirilib

Afina şəhərində Azərbaycan və Yunanıstan xarici işlər nazirlikləri arasında siyasi məsləhətləşmələrin növbəti raundu keçirilib.

Azərbaycan Xarici İşlər Nazirliyinin məlumatına görə, Azərbaycan nümayəndə heyətinə xarici işlər nazirinin müavini Fariz Rzayev, Yunanıstan nümayəndə heyətinə isə xarici işlər nazirinin müavini Aleksandra Papadopulu rəhbərlik edib. 

Tərəflər Azərbaycan-Yunanıstan siyasi dialoqunun hazırkı vəziyyətini müzakirə edib, müxtəlif səviyyələrdə qarşılıqlı səfərlərin davam etdirilməsinin vacibliyini vurğulayıblar.

Görüşdə ticarət-iqtisadi, humanitar, elm və təhsil sahələrində əməkdaşlığın perspektivləri, həmçinin Azərbaycanın iştirakı ilə həyata keçirilən strateji enerji və nəqliyyat layihələri ətrafında fikir mübadiləsi aparılıb. Beynəlxalq təşkilatlar çərçivəsində əməkdaşlığın davam etdirilməsindən məmnunluq ifadə olunub. 

Məsləhətləşmələr zamanı regiondakı vəziyyət, Azərbaycan-Ermənistan normallaşma prosesi, işğaldan azad edilmiş ərazilərdə aparılan bərpa, yenidənqurma və minatəmizləmə işləri barədə Yunanıstan tərəfinə məlumat verilib. Tərəflər qarşılıqlı maraq doğuran regional və beynəlxalq məsələləri də müzakirə ediblər.