Hafiz Səfixanov: Azərbaycanda mina qurbanlarının sayı artır

Azərbaycanda mina qurbanlarının sayı Cənubi Qafqaz üzrə qeydə alınan bütün mina qurbanlarının sayından çoxdur və bu göstərici artmaqda davam edir. Bunu “Minalar Əleyhinə Azərbaycan Kampaniyası” İctimai Birliyinin sədri Hafiz Səfixanov bildirib.

Onun sözlərinə görə, mina hadisələrinin sayını minimuma endirmək üçün maarifləndirmə tədbirləri mina təmizləmə əməliyyatları ilə paralel və mütəmadi şəkildə aparılmalıdır.

Səfixanov qeyd edib ki, mina təmizləmə prosesi uzun vaxt və maliyyə vəsaiti tələb etdiyindən ləngiyə bilər, lakin əhalinin maarifləndirilməsi işində fasilələrə yol verilməməlidir.

O bildirib ki, Azərbaycanın mina problemi ilə bağlı xüsusiyyətlərindən biri də işğaldan azad edilmiş ərazilərə hər həftə yeni insanların daxil olmasıdır. Bu səbəbdən həmin ərazilərə gedən şəxslərin mina təhlükəsi barədə məlumatlandırılması xüsusi əhəmiyyət daşıyır.

“Biz maksimalist deyilik. Başa düşürük ki, bu hadisələr zaman-zaman baş verəcək. Qarşımızda duran əsas məqsəd onları minimuma endirməkdir”, – o vurğulayıb.

Səfixanovun sözlərinə görə, təkcə avqustda bir neçə mina hadisəsi baş verib. O, kənd təsərrüfatı və digər iqtisadi fəaliyyətlərlə məşğul olan insanların təhlükəsiz əraziləri və girişinə icazə verilməyən sahələri dəqiq bilməli olduqlarını qeyd edib.

“İnsanlar bilməlidirlər ki, hansı ərazilərə daxil olmaq və harada iqtisadi fəaliyyət göstərmək olar. Girişinə icazə verilməyən ərazilərə isə qətiyyən daxil olmaq olmaz”, – o bildirib.

İctimai birliyin sədri əlavə edib ki, hazırladıqları layihə çərçivəsində ilkin olaraq təxminən 500 nəfərin altı rayonda maarifləndirilməsi nəzərdə tutulub.

Aytac Zeynalova