Xankəndinin əhalisinin 80 min nəfərə çatdırılması planlaşdırılır -xüsusi nümayəndə

Xankəndi təxminən 80 min nəfər əhalisi olan Qarabağın aparıcı şəhərlərindən birinə çevriləcək. Bunu Prezidentin Xankəndi şəhərində, Ağdərə və Xocalı rayonlarında xüsusi nümayəndəsi Elçin Yusubov bildirib.

Yusubov bu barədə Xankəndidə keçirilən Milli Biznesin İnkişafı Forumunda çıxışı zamanı deyib.

Onun sözlərinə görə, Xankəndinin baş planı üzərində iş yaxın vaxtlarda tamamlanacaq və ictimaiyyətə təqdim olunacaq.

“Hazırda şəhərin inkişaf strategiyası Qərb şirkətlərinin iştirakı ilə hazırlanır. Əsas istiqamətlərdən biri Xankəndinin ‘gənclər şəhəri’ konsepsiyası əsasında inkişaf etdirilməsidir”, – Yusubov bildirib.

O qeyd edib ki, təhsil və sosial infrastrukturun inkişafı prioritetlər sırasındadır. Qarabağ Universiteti üçün geniş ərazilər ayrılıb, tələbələr üçün müasir şəraitin yaradılması nəzərdə tutulur.

Yusubovun sözlərinə görə, tələbə və müəllim heyəti gələcəkdə şəhər əhalisinin təxminən 12-15%-ni təşkil edəcək.

“Xankəndi müasir şəhər simasına bürünəcək və həyata keçirilən layihələr şəhərin qısa müddətdə dayanıqlı inkişafını təmin edəcək”, – xüsusi nümayəndə deyib.

Aytac