Muxtar Babayev: Qlobal Cənub Platforması COP29-un həmrəylik ruhunun davamıdır

Qlobal Cənub QHT Platformasının Bakıda ilk Baş Assambleyasının keçirilməsi COP29 zamanı Azərbaycanda formalaşan həmrəylik, dialoq və əməkdaşlıq ruhunun davamıdır. Bunu Prezidentin iqlim məsələləri üzrə nümayəndəsi Muxtar Babayev Qlobal Cənub QHT Platformasının (Global South NGO Platform – GSNP) I Baş Assambleyasında çıxışında deyib.

“Bu platforma dialoq məkanından daha çox, fəaliyyət üçün bir qüvvədir",- Babayev bildirib.

O qeyd edib ki, 2024-cü ildə COP29 ərəfəsində QHT və vətəndaş cəmiyyəti nümayəndələri ilə keçirilən görüşlər zamanı iqlim fəaliyyətinin güclü ictimai iştirak, vətəndaş fəallığı və sosial sahiblik olmadan uğurlu ola bilməyəcəyi vurğulanmışdı.

Babayev COP29-un uğuruna töhfə vermiş QHT-lərə, könüllülərə, ekspertlərə və vətəndaş cəmiyyəti nümayəndələrinə təşəkkür edib.

Onun sözlərinə görə, vətəndaş cəmiyyəti COP29 prosesində etimadın, dialoqun və inklüzivliyin gücləndirilməsində mühüm rol oynayıb.

O bildirib ki, iqlim dəyişikliyi artıq yalnız ekoloji məsələ deyil, su qıtlığı, ərzaq təhlükəsizliyi, səhiyyə, miqrasiya, iqtisadi sabitlik və regional təhlükəsizlik məsələsinə çevrilib.

Babayev beynəlxalq məlumatlara istinadən deyib ki, 2024-cü il müşahidələr tarixində ən isti il olub, təxminən 3,6 milyard insan iqlim dəyişikliyinin təsirlərinə yüksək həssas ərazilərdə yaşayır, hava çirklənməsi isə hər il təxminən 7 milyon erkən ölümə səbəb olur.

Gülnar Nazimqızı