WUF13-ün ikinci günündə ilk dəfə Liderlər Sammiti keçiriləcək

Bakıda keçirilən Ümumdünya Şəhərsalma Forumunun 13-cü sessiyasının ikinci günü işinə başlayıb.

Bu gün WUF tarixində ilk dəfə Liderlər Sammiti keçiriləcək.

Forumun ikinci günündə rəsmi açılış mətbuat konfransı da baş tutacaq. Konfransda qlobal mənzil böhranı, təhlükəsiz və dayanıqlı şəhərlərin inkişafı, urbanizasiya siyasətləri və şəhər dayanıqlığının gücləndirilməsi üzrə prioritet məsələlər müzakirə olunacaq.

Gün ərzində Assambleyaların Birgə Bağlanış Mərasimi, Afrika regionu nazirlər görüşü və MINURVI — Latın Amerikası və Karib hövzəsi üzrə Mənzil və Urbanizasiya Nazirləri və Yüksək Səviyyəli Rəsmilər Forumunun sessiyası da keçiriləcək.

Mayın 22-dək davam edəcək forumda 182 ölkədən 40 mindən artıq iştirakçı qeydiyyatdan keçib.

Gülnar Nazimqızı