Qarabağda beş ildə 70 km tunel, 435 körpü tikilib - Əliyev

Hazırda hökumətin əsas vəzifəsi 30 il Ermənistanın işğalı altında olmuş Qarabağ və Şərqi Zəngəzurun yenidən qurulmasıdır. Bu sözləri Prezident İlham Əliyev Ümumdünya Şəhərsalma Forumunun 13-cü Sessiyasının (WUF13) açılış mərasimində çıxışı zamanı deyib.

Prezident qeyd edib ki, işğal dövründə region tamamilə dağıdılıb və viran qoyulub.

Onun sözlərinə görə, beynəlxalq müşahidəçilər və xarici qonaqlar Ağdamı “Qafqazın Xirosiması” adlandırıblar.

“Şəhər tamamilə yerlə-yeksan edilib. Xirosimadan fərqli olaraq bu, bir gün ərzində atom bombası nəticəsində deyil, 30 illik işğal dövründə binaların, tarixi abidələrin və yaşayış evlərinin mərhələli şəkildə sökülməsi və məhv edilməsi nəticəsində baş verib”, - Əliyev bildirib.

Prezident əlavə edib ki, hazırda “Böyük Qayıdış” proqramı icra olunur, şəhər və kəndlərin baş planları hazırlanıb.

Onun sözlərinə görə, son beş ildə Qarabağ və Şərqi Zəngəzurda 70 kilometr tunel tikilib, daha 5 kilometr tunelin inşası davam edir. Həmçinin 500 körpüdən 435-i artıq inşa olunub.

Əliyev bildirib ki, bölgədə elektrik stansiyaları, su anbarları, su təchizatı sistemləri, yaşayış evləri, məktəblər, xəstəxanalar, üç beynəlxalq hava limanı və dəmir yolları da tikilib.

“Bütün bunlar cəmi beş il ərzində həyata keçirilib”, - prezident vurğulayıb.

Gülnar Nazimqızı