Tramp: Regional enerji inteqrasiyası Azərbaycan-Ermənistan sülh prosesinin əsas sütunlarından biridir

ABŞ Prezidenti Donald Tramp Bakı Enerji Həftəsinin iştirakçılarına ünvanladığı müraciətdə bildirib ki, regional enerji inteqrasiyası Azərbaycan və Ermənistan arasında sülh prosesinin əsas elementlərindən biridir.

Trampın Azərbaycan Prezidenti İlham Əliyevə ünvanladığı məktub Bakı Enerji Həftəsinin açılış mərasimində ABŞ Dövlət Departamentinin Qafqaz danışıqları üzrə baş müşaviri Kaleb Orr tərəfindən oxunub.

“Biz Ağ Evdə görüşərək Azərbaycan və Ermənistan arasında davamlı sülhə nail olanda gələcək yol xəritəsini müəyyən etdik. Bildiyiniz kimi, regional enerji inteqrasiyası avqustun 8-də keçirilmiş tarixi sülh sammitinin əsas sütunlarından biridir”, - məktubda deyilir.

ABŞ prezidenti administrasiyasının iyun ayında bu mövzuda məhsuldar müzakirələr aparmağa hazır olduğunu bildirib.

“Birlikdə sülhü irəli aparacaq, rifahı gücləndirəcək və regionunuz, eləcə də dünya üçün daha təhlükəsiz gələcək quracağıq”, - Tramp qeyd edib.

Tramp Azərbaycanı 31-ci Bakı Enerji Həftəsinin keçirilməsi münasibətilə təbrik edib və tədbiri Azərbaycanın enerji təhlükəsizliyi sahəsində liderliyinin göstəricisi adlandırıb.

Onun sözlərinə görə, ABŞ və Azərbaycan karbohidrogen sektorunda uzunmüddətli əməkdaşlıq tarixinə malikdir və hər iki ölkə əlçatan və bol enerji təminatına sadiqdir.

“ABŞ Azərbaycanın neft-qaz sənayesinin güclü tərəfdarı olub və mən qlobal enerji təhlükəsizliyi sahəsində təməl tərəfdaşlığımızın gələcək illərdə daha da əhəmiyyətli olacağına qəti şəkildə inanıram”, - məktubda vurğulanıb.

Tramp məktubunun sonunda Bakı Enerji Həftəsinin uğurla keçirilməsi münasibətilə təbriklərini çatdırıb.

N.Təbrizli