Azərbaycana pul baratları I rübdə 29% artıb

2026-cı ilin I rübündə xaricdən Azərbaycana fiziki şəxslər tərəfindən göndərilən pul baratlarının həcmi 296,9 milyon dollar təşkil edib. Bu, 2025-ci ilin eyni dövrü ilə müqayisədə 29,4% çoxdur. Bunu bunu Azərbaycan Mərkəzi Bankının (AMB) Statistika departamentinin direktoru Samir Nəsirov tədiyə balansının açıqlanmasına həsr olunmuş brifinqə deyib.

Məlumata görə, ötən ilin I rübündə bu göstərici 229,5 milyon dollar olub.

Pul baratlarının ən böyük hissəsi Rusiyadan daxil olub. 2026-cı ilin yanvar-mart aylarında Rusiyadan Azərbaycana 110,8 milyon dollar vəsait göndərilib ki, bu da ümumi həcmin 37,3%-ni təşkil edib. Bir il əvvəl Rusiyadan daxilolmalar 85,7 milyon dollar olub. 

İkinci yerdə Türkiyə qərarlaşıb. Türkiyədən daxil olan pul baratları 49,9 milyon dollar olub və ümumi həcmin 16,8%-ni təşkil edib. 2025-ci ilin I rübündə bu göstərici 39,6 milyon dollar idi.

İrlandiyadan daxilolmalarda kəskin artım qeydə alınıb. 2025-ci ilin I rübündə bu ölkədən Azərbaycana 3,1 milyon dollar göndərildiyi halda, 2026-cı ilin eyni dövründə məbləğ 24,6 milyon dollara çatıb. İrlandiyanın ümumi baratlardakı payı 1,4%-dən 8,3%-ə yüksəlib.

ABŞ-dan daxil olan pul baratları 23,9 milyon dollar, Böyük Britaniya və Şimali İrlandiya Birləşmiş Krallığından 10,6 milyon dollar, Gürcüstandan 10,3 milyon dollar, Birləşmiş Ərəb Əmirliklərindən isə 9,9 milyon dollar təşkil edib.

Gülnar Nazimqızı