32 nəfər əlaçı məzun imtahanlarda 0–100 bal toplayıb

Qəbul imtahanında iştirak edən 78 212 nəfər 2025-ci il məzunudur. Onlardan 9 954 nəfəri və ya 12,73%-i 500-700 bal intervalında nəticə göstərib. Bu barədə Dövlət İmtahan Mərkəzinin açıqladığı statistikalarda məlumat yer alıb. 

Orta attestat balı 5 olan 13 414 məzunun 6 490 nəfəri (48,38%) 500-700 bal toplayıb, 5 198 nəfəri (38,75%) isə 300-500 bal intervalında nəticə göstərib.

Bu qrupda cəmi 0,24% abituriyent 0-100 bal aralığında nəticə əldə edib.

Orta attestat balı 4,5-5 olan məzunların 13,48%-i 500-700 bal toplasa da, bu göstərici 4-4,5 attestat balı olanlarda 3,45%-ə düşür.

Orta attestat balı 3-3,5 olan 9 595 məzundan yalnız 19 nəfər və ya 0,2%-i 500-dən yuxarı bal toplayıb.

Diqqət çəkən məqamlardan biri isə attestat balı 3 olan məzunlarla bağlıdır. Bu kateqoriyaya daxil olan 2 280 nəfərin yarıdan çoxu – 50,26%-i qəbul imtahanında 0-100 bal aralığında nəticə göstərib, yalnız bir nəfər 500 baldan yuxarı nəticə əldə edib.

Ümumilikdə, qəbul imtahanında iştirak edən 90 911 nəfərin 10 429-u və ya 11,47%-i 500-700 bal intervalında nəticə göstərib. Ən böyük pay isə 300-500 bal aralığında qeydə alınıb və bu qrupa iştirakçıların 28,35%-i daxildir.

Gülnar Nazimqızı