İlham Əliyev Türk Dövlətləri Təşkilatının tədbirində iştirak etməyəcək

Azərbaycanın xarici işlər naziri Ceyhun Bayramov Türkiyədə keçiriləcək Türk Dövlətləri Təşkilatının (TDT) Zirvə görüşündə ölkəni təmsil edəcək.

“Report”un əldə etdiyi məlumata görə, Prezident İlham Əliyev əvvəlcədən planlaşdırılmış tədbirlərdə iştirak edəcəyi və iş qrafikinin sıxlığı səbəbindən Zirvə görüşünə qatılmayacaq.

Oktyabrın 30-da Bakıda tarixdə ilk dəfə keçirilən FİFA U-15 Dünya Çempionatı və Festivalının final oyunu və rəsmi bağlanış mərasimi olacaq. Prezident İlham Əliyevin yarışın finalçılarını mükafatlandırması əvvəlcədən planlaşdırılıb.

Prezidentin tapşırığına əsasən, Azərbaycanı TDT-nin Zirvə görüşündə Ceyhun Bayramov təmsil edəcək. Azərbaycan nümayəndələri görüş çərçivəsində keçiriləcək digər tədbirlərdə də iştirak edəcəklər.