Azərbaycana yay fəsli daxil olub

Azərbaycanda astronomik yay fəsli iyunun 21-də Bakı vaxtı ilə saat 12:24-də başlayıb.

Yay günəş duruşu zamanı Şimal yarımkürəsində yay, Cənub yarımkürəsində isə qış fəsli başlayır. Bu zaman Yerin fırlanma oxu ilə Günəşin istiqaməti arasında ən kiçik bucaq yaranır və Günəş səmada ilin ən yüksək nöqtəsinə çatır.

Bakıda Günəş günorta saatlarında üfüqdən maksimum 73,1 dərəcə hündürlükdə müşahidə olunur.

İyunun 21-i həm də ilin ən uzun gündüzü və ən qısa gecəsi hesab edilir. Gündüzün uzunluğu 15 saat 3 dəqiqə 24 saniyə, gecənin uzunluğu isə 8 saat 56 dəqiqə 36 saniyə təşkil edir.

Mütəxəssislərin hesablamalarına görə, astronomik yay fəsli 93 gün 15 saat 40 dəqiqə 42 saniyə davam edəcək.