İlham Əliyev TBMM sədri Numan Kurtulmuşu qəbul edib

Azərbaycan Prezidenti İlham Əliyev çərşənbə axşamı Türkiyə Böyük Millət Məclisinin (TBMM) sədri Numan Kurtulmuş başda olmaqla nümayəndə heyətini qəbul edib.

Prezident İlham Əliyev TBMM sədrinin Bakıda keçirilən İslam Əməkdaşlıq Təşkilatının üzvü dövlətlərin Parlament İttifaqı Konfransının 20-ci sessiyasında iştirakının əhəmiyyətini vurğulayıb.

Dövlət başçısı bildirib ki, gələcəkdə də Azərbaycanda İslam Əməkdaşlıq Təşkilatı çərçivəsində müxtəlif tədbirlərin keçirilməsi nəzərdə tutulur və İslam ölkələri arasında əməkdaşlığın genişləndirilməsi mühüm əhəmiyyət daşıyır.

Numan Kurtulmuş qəbula və konfransın yüksək səviyyədə təşkilinə görə təşəkkür edərək Türkiyə Prezidenti Rəcəb Tayyib Ərdoğanın salamlarını İlham Əliyevə çatdırıb.

Azərbaycan Prezidenti salamlara görə minnətdarlığını ifadə edib və öz salamlarının da Türkiyə liderinə çatdırılmasını xahiş edib.

Kurtulmuş Bakıda keçirilən konfransın İslam Əməkdaşlıq Təşkilatı çərçivəsində əməkdaşlığın genişləndirilməsi baxımından əhəmiyyətini vurğulayıb və Prezident İlham Əliyevin tədbir iştirakçılarına ünvanladığı müraciətin məzmununu yüksək qiymətləndirib.

Görüş zamanı Azərbaycan-Türkiyə münasibətlərinin əsas siyasi sənədlərindən biri olan Şuşa Bəyannaməsinin əhəmiyyətinə toxunulub. Tərəflər iki ölkə arasında qardaşlıq və müttəfiqlik münasibətlərinin, o cümlədən parlamentlərarası əməkdaşlığın uğurla inkişaf etdiyini qeyd ediblər.

Söhbət zamanı Azərbaycan-Türkiyə tərəfdaşlığının Cənubi Qafqazda sülh və təhlükəsizliyin möhkəmləndirilməsində mühüm rol oynadığı vurğulanıb.

Tərəflər həmçinin qanunverici orqanlar arasında əməkdaşlığın hazırkı vəziyyəti və onun daha da genişləndirilməsi perspektivləri ətrafında fikir mübadiləsi aparıblar.