“Azenco”nun keçmiş rəhbəri 3 milyon manatdan çox mənimsəmədə ittiham olunur

“Azərenerji” ASC-nin keçmiş prezidenti Etibar Pirverdiyevlə əlaqələndirilən “Azenco” şirkətinin sabiq rəhbəri Vüqar Əliyev xüsusilə külli miqdarda mənimsəmə ittihamı ilə həbs edilib. Bu barədə "Qafqazinfo" məlumat yayıb.

Məlumata görə, V. Əliyev 3 milyon manatdan çox vəsaiti mənimsəməkdə ittiham olunur. Cinayət işi üzrə ibtidai istintaq başa çatıb və ona Azərbaycan Respublikası Cinayət Məcəlləsinin 179.4-cü maddəsi (xüsusilə külli miqdarda mənimsəmə) ilə yekun ittiham elan edilib.

Həmin maddə üzrə 10 ildən 14 ilədək azadlıqdan məhrumetmə cəzası nəzərdə tutulur.

Məlumata əsasən, cinayət işi yaxın günlərdə baxılması üçün məhkəməyə göndəriləcək.

“Azenco” Etibar Pirverdiyevin “Azərenerji”yə rəhbərlik etdiyi dövrdə Azərbaycanda iri enerji infrastrukturu layihələrinin və dövlət büdcəsi hesabına maliyyələşdirilən digər layihələrin icrasında iştirak edib. Şirkət həmçinin Bakıda bir sıra yaşayış binalarının tikintisini həyata keçirib. Pirverdiyevin vəzifədən ayrılmasından sonra şirkətə yönələn dövlət sifarişlərinin və büdcə vəsaitlərinin həcminin əhəmiyyətli dərəcədə azaldığı bildirilir. Vüqar Əliyev 2022–2023-cü illərdə “Azenco”nun İdarə Heyətinin sədri vəzifəsində çalışıb.