Şəxsi maraqlar vaxtında bəyan edilməlidir - komitə sədri

Maraqların toqquşması haqqında” qanun şəxsi maraqların vaxtında bəyan edilməsi və belə halların idarə olunması üçün aydın mexanizmlər müəyyən etməlidir. Bunu Müdafiə, təhlükəsizlik və korrupsiya ilə mübarizə komitəsinin sədri deputat Arzu Nağıyev bildirib.

Onun sözlərinə görə qanunda maraqların toqquşmasının hansı hallarda yarandığı, kimlərə şamil edildiyi və hansı qaydada açıqlanmalı olduğu dəqiq göstərilməlidir.

“Bu qanunun müzakirəsi zamanı əsas diqqətimiz yalnız hüquqi normaların müəyyən edilməsinə deyil, həm də onların praktikada nə dərəcədə səmərəli işləyəcəyinə yönəlməlidir”, - Nağıyev qanun layihəsinin müzakirəsi zamanı deyib.

Deputatın sözlərinə görə, maraqların toqquşması özlüyündə hər zaman cinayət hesab olunmur, lakin düzgün idarə edilmədikdə korrupsiya üçün əlverişli şərait yarada bilər. Vəzifəli şəxsin şəxsi maraqları dövlət satınalmaları, işə qəbul, təyinat və maliyyə vəsaitlərinin bölüşdürülməsi ilə bağlı qərarlara təsir göstərə bilər.

Nağıyev qanunda şəxsi maraqların hansı quruma, hansı müddətdə və hansı qaydada bəyan edilməli olduğunun dəqiq müəyyənləşdirilməsinin vacibliyini vurğulayıb.

O qeyd edib ki, maraqların toqquşması aşkarlandıqda şəxsin qərarvermə prosesində iştirakının məhdudlaşdırılması və ya məsələnin başqa səlahiyyətli şəxsə həvalə edilməsi kimi tədbirlər nəzərdə tutula bilər.

Deputat məsuliyyət mexanizmlərinin aydın və proporsional olmasının, qəsdən məlumat gizlədilməsi ilə maraqların vaxtında açıqlanması hallarının fərqləndirilməsinin vacibliyini də qeyd edib.

O, qanun qəbul edildikdən sonra dövlət qurumlarında müvafiq təlimlərin keçirilməsinə və praktiki tövsiyələrin hazırlanmasına çağırıb.

Nağıyevin bildirdiyinə görə, qanun layihəsi 2022–2026-cı illər üçün Korrupsiyaya qarşı mübarizənin gücləndirilməsinə dair Milli Fəaliyyət Planının icrası məqsədilə hazırlanıb.

Gülnar Nazimqızı