Baş Prokurorluq Tbilisidə öldürülən azərbaycanlı qadınla bağlı istintaqı izləyir

Azərbaycan Baş Prokurorluğu Gürcüstanın paytaxtı Tbilisidə Azərbaycan vətəndaşı Fatimə Kərimovanın qəsdən öldürülməsi ilə bağlı aparılan istintaqı diqqətdə saxladığını açıqlayıb.

Baş Prokurorluğun Mətbuat Xidmətinin məlumatına görə, cinayət əməlini törətməkdə şübhəli bilinən, zərərçəkmişin qohumu olan şəxs barəsində Gürcüstanın hüquq-mühafizə orqanları tərəfindən prosessual tədbirlər görülür, onun saxlanılması və cinayət məsuliyyətinə cəlb edilməsi istiqamətində iş aparılır.

Qurumun bildirdiyinə görə, hadisənin ictimai əhəmiyyəti və zərərçəkmişin Azərbaycan vətəndaşı olması nəzərə alınaraq, Baş Prokurorluq Gürcüstan Prokurorluğuna rəsmi müraciət ünvanlayıb. Müraciətdə cinayət işinin tam, hərtərəfli və obyektiv araşdırılmasının təmin olunması, həmçinin zərurət yaranacağı təqdirdə beynəlxalq hüquqi əməkdaşlıq çərçivəsində istintaqa hüquqi yardım göstərilməsinə hazır olunduğu qeyd edilib.

Baş Prokurorluq vurğulayıb ki, Azərbaycan vətəndaşlarının həyatına, sağlamlığına və qanunla qorunan hüquqlarına qarşı törədilən cinayətlərə münasibətdə prinsipial mövqe tutur və belə halların ölkə hüdudlarından kənarda baş verməsindən asılı olmayaraq onların hüquq və qanuni mənafelərinin müdafiəsini diqqətdə saxlayacaq.