AQTA 2025-ci ildə çörək istehsal edən 25 müəssisənin fəaliyyətini dayandırıb

Azərbaycan Qida Təhlükəsizliyi Agentliyi (AQTA) 2025-ci ildə çörək istehsalı müəssisələrində apardığı yoxlamalar zamanı ciddi pozuntular aşkar edilən 25 müəssisənin fəaliyyətini dayandırıb. Bu barədə agentlik anews.az-ın sorğusuna cavab olaraq bildirib. 

Məlumata görə, il ərzində ölkə üzrə fəaliyyət göstərən 141 çörək istehsalı müəssisəsində 163 yoxlama aparılıb.

Yoxlamalar zamanı əsasən sanitar-gigiyenik qaydaların pozulması, məhsulların izlənmə sisteminin olmaması və qanunvericiliyin tələblərinə uyğun etiketlənmənin təmin edilməməsi kimi nöqsanlar aşkarlanıb. Pozuntuya yol vermiş sahibkarlıq subyektləri barəsində inzibati tənbeh tədbirləri görülüb və icrası məcburi göstərişlər verilib.

AQTA bildirib ki, fəaliyyəti məhdudlaşdırılan 25 müəssisədən 14-də nöqsanlar aradan qaldırıldıqdan sonra istehsalın bərpasına icazə verilib.

Agentliyin məlumatına əsasən, nəzarət tədbirləri çərçivəsində 41 müəssisədə istehsal olunan çörəkdən nümunələr götürülərək minimum keyfiyyət və təhlükəsizlik göstəriciləri üzrə laborator müayinələr aparılıb. Sınaqların nəticələrinə görə, məhsullarda hər hansı uyğunsuzluq aşkarlanmayıb.

Gülnar Nazimqızı