Qlobal rəqəmsal iqtisadiyyat 24 trilyon dollara çatıb - komitə sədri

Hazırda qlobal rəqəmsal iqtisadiyyatın həcmi təxminən 24 trilyon ABŞ dolları təşkil edir və dünya ümumi daxili məhsulunun 21 faizini formalaşdırır.

Azərbaycan bu sahədə rəqəmsal transformasiyanı sürətləndirmək və innovasiya əsaslı iqtisadi modelin hüquqi bazasını yaratmaq məqsədilə innovativ fəaliyyətin dəstəklənməsinə dair yeni qanun layihələrini müzakirəyə çıxarıb.

Milli Məclisin İqtisadi siyasət, sənaye və sahibkarlıq komitəsinin sədri Azər Əmiraslanov parlamentdə bildirib ki, birinci oxunuşda müzakirə olunan dörd qanun layihəsi ayrı-ayrı sənədlər deyil, rəqəmsal inkişaf, süni intellekt, innovasiya ekosistemi və kibertəhlükəsizlik sahələrini əhatə edən vahid qanunvericilik paketidir.

Onun sözlərinə görə, layihələrin məqsədi ölkənin texnoloji potensialını gücləndirmək, innovasiya əsaslı iqtisadiyyata keçidi sürətləndirmək və bu sahədə vahid dövlət siyasətini formalaşdırmaqdır.

Deputat qeyd edib ki, qanun layihələri "Azərbaycan 2030: sosial-iqtisadi inkişafa dair Milli Prioritetlər" sənədində müəyyən edilən "Rəqabətli insan kapitalı və müasir innovasiyalar məkanı" strateji istiqamətinin həyata keçirilməsinə xidmət edir. Bu çərçivədə ölkədə Rəqəmsal İnkişaf Konsepsiyası, Süni İntellekt Strategiyası və rəqəmsal inkişafın sürətləndirilməsi üzrə fəaliyyət planı qəbul edilib.

Əmiraslanov xatırladıb ki, bu ilin fevralında Prezident İlham Əliyevin sədrliyi ilə keçirilən "Azərbaycanın Yeni Rəqəmsal Arxitekturası" müşavirəsində dövlət qurumları arasında koordinasiyanın gücləndirilməsi tapşırılıb. Daha sonra Birinci vitse-prezident Mehriban Əliyevanın rəhbərliyi ilə Rəqəmsal İnkişaf Şurası yaradılıb.

Deputat bildirib ki, yeni qanunlar innovativ fəaliyyətin maliyyələşdirilməsi, startapların inkişafı, investor hüquqlarının müdafiəsi və intellektual mülkiyyətin qorunması üçün hüquqi mexanizmlər yaradacaq. Onun sözlərinə görə, bu addımlar Azərbaycanın regional innovasiya mərkəzlərindən birinə çevrilməsinə dəstək verəcək.

Gülnar Nazimqızı