Fazil Mustafa rəqəmsal təhlükəsizlikdə gecikmələrin risklərinə diqqət çəkib

Əvvəlki dövrlərdə müəyyən sahələrdə illərlə gecikmək mümkün idisə, rəqəmsal texnologiyalar dövründə hətta bir gün və ya bir saatlıq gecikmə belə ölkənin inkişafına ciddi təsir göstərə bilər. Bunu deputat Fazil Mustafa deyib. 

Onun sözlərinə görə, bu sahənin prioritet kimi müəyyənləşdirilməsi yaxın vaxtlarda Azərbaycanın Birinci vitse-prezidenti Mehriban Əliyevanin rəhbərliyi ilə aidiyyəti qurumların iştirakı ilə keçirilən müşavirədə də vurğulanıb və bundan sonra qanun layihələrinin operativ şəkildə parlamentə təqdim olunması dövlətin məsələyə verdiyi önəmi göstərir.

Fazil Mustafa bildirib ki, müasir dövrdə təhlükəsizlik yalnız fiziki sərhədlərin qorunması ilə məhdudlaşmır. Onun sözlərinə görə, Azərbaycanın informasiya məkanına müxtəlif xarici təsirlər yönəlir və bu səbəbdən rəqəmsal təhlükəsizlik imkanlarının gücləndirilməsi vacibdir.

Deputat rəqəmsal tədqiqatların inkişaf etdirilməsinin zəruriliyini vurğulayaraq bildirib ki, bu prosesdə dövlət qurumları ilə yanaşı, qeyri-hökumət təşkilatları da iştirak etməlidir. O qeyd edib ki, beynəlxalq təcrübədə QHT-lər rəqəmsal təhlil və informasiya təhlükəsizliyi sahəsində tənzimləyici qurumlara dəstək verir və Azərbaycanda da bu istiqamətdə ixtisaslaşmış təşkilatların fəaliyyətinin təşviq olunması məqsədəuyğundur.

Çıxışında Konstitusiyada təsbit olunan dünyəvilik prinsipinə də toxunan deputat bildirib ki, Azərbaycanın ərazi bütövlüyünün bərpasından sonra dünyəvi dövlət prinsipinin qorunması da strateji əhəmiyyət kəsb edir. Onun sözlərinə görə, xaricdən müxtəlif ideoloji təsirlər müşahidə olunur və rəqəmsal mühitdə bu cür çağırışlara qarşı həssas yanaşma nümayiş etdirilməlidir.

Fazil Mustafa əlavə edib ki, rəqəmsal texnologiyalarla bağlı qanunvericilik hazırlanarkən informasiya təhlükəsizliyi ilə yanaşı, Azərbaycanın dünyəvi dövlət prinsiplərinin rəqəmsal mühitdə qorunması məsələsi də diqqətdə saxlanılmalıdır.

Gülnar Nazimqızı