ABŞ İran neftinin satışına verilən müvəqqəti icazəni ləğv edib

ABŞ administrasiyası Hörmüz boğazında kommersiya tankerlərinə hücumlardan sonra İran neftinin satışına müvəqqəti icazə verən lisenziyanı ləğv edib. Bu barədə ABŞ rəsmisi məlumat verib. 

ABŞ Maliyyə Nazirliyi bildirib ki, iyunda Vaşinqton və Tehran arasında əldə olunmuş memorandum çərçivəsində verilən ümumi lisenziya qüvvədən çıxarılır. Yeni qərara əsasən, əvvəlki icazə əsasında həyata keçirilən əməliyyatlar iyulun 17-dək mərhələli şəkildə dayandırılmalıdır. Əvvəlki lisenziya avqustun 21-dək qüvvədə qalmalı idi.

ABŞ rəsmisi İranın Hörmüz boğazındakı hərəkətlərini "tamamilə qəbuledilməz" adlandıraraq bunun nəticəsiz qalmayacağını bildirib. Qərar son günlər strateji su yolunda üç kommersiya tankerinin naməlum mərmilərlə vurulmasından sonra qəbul edilib. ABŞ hadisəyə görə İranı məsuliyyət daşımaqda ittiham etsə də, Tehran hələlik bu iddialara münasibət bildirməyib.

İyunda imzalanmış memorandum çərçivəsində ABŞ İrana neft hasilatı, satışı və çatdırılması ilə bağlı sanksiyalardan müvəqqəti güzəşt tətbiq etmişdi. Bu addım tərəflər arasında daha geniş sülh sazişi üzrə danışıqların davam etdirilməsi üçün etimad quruculuğu tədbirlərindən biri hesab olunurdu.

ABŞ rəsmisi bildirib ki, son gərginliyə baxmayaraq, Vaşinqton İranla yekun razılaşmanın əldə olunması istiqamətində danışıqları davam etdirir.

Qərarın açıqlanmasından sonra dünya bazarlarında neft qiymətləri 5%-dən çox artıb. Analitiklər hesab edirlər ki, Hörmüz boğazında artan gərginlik və İran neftinə yenidən tətbiq olunan məhdudiyyətlər qlobal enerji bazarında qeyri-müəyyənliyi artırır.

Gülnar Nazimqızı