Hacıyev “TikTok” və “LinkedIn” nümayəndələri ilə əməkdaşlıq perspektivlərini müzakirə edib

Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Şuşa Qlobal Media Forumu çərçivəsində “TikTok” və “LinkedIn” şirkətlərinin nümayəndələri ilə Azərbaycanın rəqəmsal sahədə əməkdaşlıq perspektivlərini müzakirə edib.

Hikmət Hacıyev bu barədə "X" sosial şəbəkəsində paylaşım edib.

Məlumata görə, görüşlərdə “TikTok”un Şərqi Avropa üzrə Hökumətlə Əlaqələr və İctimai Siyasət Departamentinin rəhbəri Diana Ryan, “LinkedIn”in Avropa, Yaxın Şərq, Afrika və Latın Amerikası regionları üzrə Dövlət Sektoru və Qeyri-Kommersiya Təşkilatları ilə Satış Departamentinin rəhbəri Şeymus Klensi (Seamus Clancy), eləcə də Dharana Digital şirkətinin direktoru, süni intellekt və sosial media üzrə təlimçi və tədqiqatçı Karen Sazerlend (Dr. Karen Sutherland) iştirak ediblər.

Prezidentin köməkçisinin sözlərinə görə, görüşlərdə Azərbaycanla əməkdaşlığın genişləndirilməsi, rəqəmsal idarəetmə məsələləri, uşaqların onlayn mühitdə daha yaxşı qorunmasına yönəlmiş yeni qanunvericiliyin tətbiqi, həmçinin bu sahədə beynəlxalq qabaqcıl təcrübələr ətrafında fikir mübadiləsi aparılıb.