Deputat: Şuşa Qlobal Media Forumu Azərbaycanın mövqeyinin beynəlxalq auditoriyaya çatdırılması üçün mühüm platformaya çevrilib

IV Şuşa Qlobal Media Forumu Azərbaycanın mövqeyinin və regionda yaranmış yeni reallıqların beynəlxalq ictimaiyyətə çatdırılması baxımından mühüm platformaya çevrilib. Bunu Milli Məclisin deputatı Könül Nurullayeva bildirib.

Deputatın sözlərinə görə, forum çərçivəsində Prezident İlham Əliyevin beynəlxalq media nümayəndələrinin suallarını cavablandırması Azərbaycanın xarici siyasəti, regional əməkdaşlıq, enerji təhlükəsizliyi və qlobal geosiyasi proseslərlə bağlı mövqeyinin birbaşa beynəlxalq auditoriyaya çatdırılmasına imkan yaradıb.

Nurullayeva qeyd edib ki, dövlət başçısının çıxışında Azərbaycanın beynəlxalq münasibətlər sistemində "orta güc" statusuna yüksəldiyi, ölkənin Avrasiyanın mühüm siyasi, iqtisadi və tranzit mərkəzlərindən birinə çevrildiyi vurğulanıb.

Deputat bildirib ki, Prezident enerji təhlükəsizliyi, Avropa İttifaqı və ABŞ ilə münasibətlər, regional kommunikasiyaların inkişafı, eləcə də milli birlik və həmrəyliyin əhəmiyyəti ilə bağlı vacib mesajlar verib.

Onun sözlərinə görə, forumda onlarla ölkədən media nümayəndələrinin və ekspertlərin iştirakı bəzi dairələrin tədbirin beynəlxalq nüfuzuna xələl gətirmək cəhdlərinin nəticəsiz qaldığını göstərib.
"Xarici qonaqlar Qarabağda aparılan bərpa və yenidənqurma işlərini yerində görmək, bölgədə formalaşmış yeni reallıqlarla tanış olmaq imkanı əldə etdilər. Bu da həqiqətlərin beynəlxalq ictimaiyyətə çatdırılması baxımından mühüm əhəmiyyət daşıyır", - deputat əlavə edib.

Nurullayevanın fikrincə, Şuşa Qlobal Media Forumu media əməkdaşlığının inkişafına, beynəlxalq dialoqun genişlənməsinə və Azərbaycanın mövqeyinin qlobal auditoriyaya çatdırılmasına xidmət edən nüfuzlu platforma kimi əhəmiyyətini ildən-ilə artırır.