Son bir ayda narkotiklə bağlı 199 fakt aşkarlanıb, 372 kiloqramdan çox narkotik götürülüb - Video

Bakıda son bir ay ərzində keçirilən əməliyyat-axtarış və profilaktik tədbirlər zamanı narkotik vasitələrin və psixotrop maddələrin qanunsuz dövriyyəsi ilə bağlı 199 fakt aşkarlanıb. Bu barədə Daxili İşlər Nazirliyi məlumat yayıb.

Məlumata görə, aşkarlanan faktlardan 192-si üzrə Cinayət Məcəlləsinin müxtəlif maddələri ilə cinayət işləri başlanılıb, 7 fakt üzrə isə inzibati icraat aparılıb. Həmin işlər çərçivəsində 161 nəfər barəsində həbs və digər qətimkan tədbirləri seçilib.

Əməliyyatlar nəticəsində qanunsuz dövriyyədən ümumilikdə 372 kiloqram 685 qram heroin, marixuana, tiryək, metadon, həşiş və metamfetamin aşkar edilərək götürülüb.

Nazirlik narkotik vasitələrin qanunsuz dövriyyəsinə qarşı əməliyyat-axtarış və profilaktik tədbirlərin davam etdirildiyini bildirib.