Moody’s SOCAR-ın reytinqləri üzrə planlı baxışı başa çatdırıb

Moody’s Ratings Azərbaycan Dövlət Neft Şirkətinin (SOCAR) reytinqləri üzrə planlı dövri baxışı başa çatdırıb və şirkətin reytinqlərini dəyişməz saxlayıb.

Agentliyin məlumatına görə, qiymətləndirmə reytinq komitəsinin iclasında aparılıb. Moody’s bildirib ki, bu baxış yeni reytinq qərarı hesab edilmir və yaxın gələcəkdə reytinq üzrə qərar veriləcəyinə işarə etmir. 

SOCAR-ın uzunmüddətli emitent reytinqi Baa3, proqnozu isə sabit olaraq qalıb. Moody’s-in dövlətlə əlaqəli emitentlər metodologiyasına əsasən, reytinq şirkətin ba2 səviyyəsində Əsas Kredit Qiymətləndirməsini (BCA), Azərbaycanın Baa3 suveren reytinqini, SOCAR ilə dövlət arasında çox yüksək defolt asılılığını və zərurət yarandıqda dövlət dəstəyinin yüksək ehtimalını əks etdirir. 

Moody’s qeyd edib ki, SOCAR-ın ba2 səviyyəli BCA göstəricisi şirkətin Azərbaycanın neft-qaz sektorunda strateji roluna, milli iqtisadiyyat üçün əhəmiyyətinə, güclü maliyyə nəticələrinə və möhkəm kredit göstəricilərinə əsaslanır. Bununla yanaşı, agentlik karbohidrogen hasilatının azalmasını, neft qiymətlərində dəyişkənliyi, birləşmə və satınalmaların artmasını, korporativ idarəetmə amillərini və fəaliyyətin əsasən Azərbaycanda cəmlənməsini kredit profilini məhdudlaşdıran amillər kimi qiymətləndirib. 

N. Təbrizli