Azərbaycanda sığorta ödənişləri 27% artıb

Bu ilin yanvar-iyununda Azərbaycanda fəaliyyət göstərən 16 sığorta şirkəti üzrə yığılan sığorta haqları ötən ilin eyni dövrü ilə müqayisədə 6,2% artaraq 867,4 milyon manata çatıb.

Azərbaycan Mərkəzi Bankının açıqladığı məlumata görə, hesabat dövründə sığorta şirkətləri tərəfindən həyata keçirilən ödənişlərin həcmi isə illik müqayisədə 27,2% artaraq 549,7 milyon manat təşkil edib.

Nəticədə, ilin ilk altı ayında bazarda toplanan hər 100 manat sığorta haqqına qarşılıq 63,4 manat ödəniş edilib. Bu göstərici ötən ilin eyni dövründə 52,9 manat olub.

Azərbaycanda sığorta bazarında əsas fəaliyyət istiqamətlərini həyat və qeyri-həyat sığortası təşkil edir. Sığorta haqları bazarın həcmini, ödənişlər isə sığorta hadisələri üzrə şirkətlərin müştərilərə ödədiyi vəsaiti əks etdirən əsas göstəricilərdən hesab olunur. Ödənişlərin sığorta haqlarına nisbətinin artması bazarda kompensasiyaların həcminin yüksəldiyini göstərir.